KUCHING: Kontinjen Para Sarawak deka ngambi bagi ba semua kategori lumba enggau main ti dipekitka dalam Lumba enggau Main Para Malaysia (Para SUKMA) 2024 kena nyapai tagit nyadi champion.
Menteri Pemansang Indu, Nembiak Mit enggau Pengelantang Komuniti, Dato Sri Fatimah Abdullah madahka, nya strategi dikena kontinjen Para Sarawak ngerampas baru gelar champion nya ari nengeri Sabah ti begelar champion sebedau tu.
Para SUKMA 2024 ti diatur kena 20 ngagai 28 September deka bisi 361 iti acara ti mungkur 10 iti lumba enggau main iya nya olahraga, nyemerai, badminton, pingpong, 10pin bowling, boccia, lawn bowls, powerlifting, memanah enggau catur, ti dipelaba digulu 1,400 iku atlet, enggau 600 iku pegawai.
“Kitai ngarapka sekali tu (Para Sukma 2024) Sarawak ulih masuk naka pemayuh (acara) ke ulih dipasuk, nya strategi kitai laban kitai nyadi tuai rumah.
“Tagit kitai (dalam Para SUKMA 2024) deka nyadi champion. Kebendar kitai udah ngaga ‘post-mortem’ kebuah kitai alah maya di Kuala Lumpur, iya nya Sabah udah ngalahka kitai.
“Kitai udah meda nama pengelemi, nama ti enda ngasuh kitai enda mujur nyadi champion. Lalu aku ngasaika ke sekali tu kitai ulih manah agi ari sebedau tu,” ku iya dalam aum pengarang berita seraya madahka Para SUKMA 2024 deka diatur di mengeri besai Kuching.
Dulu ari nya, Fatimah nerima penemuai basa ari raban Opis Menteri Nembiak, Lumba enggau Main, sereta Pemansang Orang Dagang, enggau, ari Opis Menteri Pemansang Indu, Nembiak Mit enggau Pengelantang Komuniti, bekaul enggau Para SUKMA 2024, ti diatur ba rumah iya di Jalan Bakti ditu, kemari.
Berebak enggau tu Fatimah madahka Sapit Menteri iya, Datuk Razi Sitam dipilih baru nyadi ‘Chef de mission’ Para SUKMA.
Iya madahka lagu, logo rasmi enggau maskot deka sama enggau SUKMA 2024.
Sebaka enggau prinsip ke dipegai kitai, ku Fatimah, kelebih agi ungkup atlet Para SUKMA iya nya sida ti nyelai pendiau patut diberi peluang mantaika pengulih enggau peneleba sida dalam lumba enggau main.
“Enti sida ulih menang nya udah tentu manah, tang beri sida peluang.
“Nya alai kitai meransang ni naka pemayuh acara ke ulih dipasuk atlet kitai, patut diambi, awakka sida bulih peluang enggau peneleba, kelebih agi ke sekali tu kitai nyadi tuai rumah,” ku iya.
Nyerumba Sarawak nyadi tuai rumah Para SUKMA, deka diatur pengerami serumpu makai lemai kena 21 September di Hikmah Exchange Kuching sereta deka digulu tuai dipebasa Premier Sarawak, Datuk Patinggi Tan Sri Abang Johari Tun Openg.
“Pengerami bejadi Para SUKM diatur kena 22 Septmeber ba Stadium Perpaduan sereta kitai merambu deka nganggauka Tuai Pemegai Menua Tun Pehin Sri Dr Wan Junaidi Tuan Jaafar,” ku iya.-Utusan Borneo
